Bótakröfur á hendur bullu um 100 milljónir króna

Danska knattspyrnusambandið hefur ákveðið að höfða skaðabótamál á hendur fótboltabullunni sem hljóp inn á völlinn í leik Svía og Dana í júní síðastliðnum og réðst á dómara leiksins. Bótakrafan hljóðar upp á um 20 milljónir íslenskra króna og bætist við um 80 milljóna króna kröfu rekstraraðila Parken sem sett var fram fyrr í vikunni.

Umræddur leikur var flautaður af eftir að áhorfandinn hljóp inn á völlinn og réðst að dómaranum. Þetta gerðist eftir að vítaspyrna hafði verið dæmd á danska landsliðsmanninn Christian Poulsen fyrir að slá mótherja sinn. Svíum var í kjölfarið dæmdur 3-0 sigur í leiknum og danska landsliðinu bannað að leika næstu tvo leiki í undankeppni EM í knattspyrnu á Parken. Enn fremur var danska knattspyrnu sambandið sektað um rúmar þrjár milljónir.

Forsvarsmönnum danska knattspyrnusambandsins reiknast til að tapið af þessum völdum verði um 20 milljónir króna króna og þá peninga vill hún að bullan greiði. Sú upphæð bætist við kröfu rekstraraðila Parken sem hljóðar upp á 80 milljónir vegna tekjutaps. Við þetta bætist að bullan verður ákærð fyrir líkamsárás og fyrir að fara inn á völlinn í leyfisleysi. Mál hennar verður tekið fyrir við dómstól í Kaupmannahöfn í næstu viku.