Blóðugar deilur mafíugengja

Deilur ítalskra mafíugengja eru taldar ástæða þess að sex Ítalar voru myrtir í Þýskalandi fyrr í mánuðinum. Lögreglan á Ítalíu handtók í dag á fjórða tuga manna í tengslum við morðin.

Um þrjú hundruð lögreglumenn tóku þátt í aðgerðunum í dag en flestir voru handteknir í bænum San Luca á suðurhluta Ítalíu. Þar hafa um árabil blóðug átök átt sér stað milli tveggja mafíugengja sem barist hafa um völdin. Annar hópurinn er Kalabríamafían svokallaða en talið er að hún stýri flutningi kókaíns um stóran hluta Evrópu.

Um miðjan ágústmánuð voru sex ítalskir karlmenn á aldrinum sextán til þrjátíu og átta ára skotnir til bana í afmælisveislu á veitingastað í Duisburg í Þýskalandi. Þýska- og ítalska lögreglan hafa saman unnið að rannsókn málsins og telja víst að um einhverskonar hefndarmorð hafi verið að ræða en slík morð hafa verið algeng hjá gengjunum tveimur.

Lögreglan óttaðist að morðin gætu orðið upphaf morðöldu og til að koma í veg fyrir það ákvað hún að handtaka fjörtíu meðlimi gengjanna tveggja til að taka þá af götunum. Handtökuskipanir voru því gefnar út fyrir ýmsa ólöglega starfsemi en alls voru þrjátíu og tveir handteknir.