Viðbrögðin of hæg

Fórnarlömb fjöldamorðanna við Virginía Tech-háskólann í Bandaríkjunum hefðu hugsanlega orðið mun færri ef yfirvöld hefðu brugðist skjótar við, samkvæmt nýrri rannsókn.

Hefðu yfirvöld við skólann ekki beðið í yfir tvær klukkustundir með að tilkynna nemendum og starfsfólki skólans um fyrri skotárás nemandans hefði verið hægt að bjarga mannslífum þegar Cho Seung-hui hóf seinni árás sína inni í einni af kennslustofum skólans.

Þetta kemur fram í nýrri skýrslu um fjöldamorðin sem birt hefur verið. Þar kemur jafnframt fram að yfirvöld við skólann hafi ekki brugðist á réttan hátt við upplýsingum sem áður höfðu fram komið um að nemandinn væri ekki heill á geði.

Fyrstu viðvörunarbjöllur fóru að hringja innan skólans árið 2005 eftir að kennara Cho Seung-hui barst sláandi ritgerð frá honum. Lögreglu á háskólasvæðinu höfuð einnig borist kvartanir frá stúlkum sem sögðu hann sitja um sig. Skýrsluhöfundar telja að á þeim tímapunkti hefðu yfirvöld við skólann átt að grípa inn í og tryggja Cho viðeigandi sálfræði- eða læknismeðferð.

Alls myrti Cho þrjátíu og tvo í árásunum tveimur en að lokinni þeirri síðari snéri hann byssunni að sjálfum sér og skaut sig. Um er að ræða eina mannskæðustu skotárás í áratugi í Bandaríkjunum. Í skýrslunni er það einnig gagnrýnt hversu lítinn stuðning aðstandendur fórnarlambanna fengu fyrst á eftir árásina.