Bandarísk hjón eignast sitt sautjánda barn

Hin bandaríska Michelle Duggar eignaðist í gær sitt sautjánda barn. Dóttirin Jennifer fæddist í Arkansas eina mínútu yfir tíu og gekk fæðingin hratt og vel fyrir sig. Hún hún tók ekki nema 30 mínútur enda móðirin í góðri æfingu. Hún hefur verið þunguð 11 ár af lífi sínu.

Foreldrarnir þau Michelle Duggar og Jim Bob þakka guði fyrir börnin sín og segjast alveg geta hugsað sér að eignast fleiri. Fjölskyldan býr í stóru einbýlishúsi í bænum Tontitown og fá börnin kennslu á heimilinu. Foreldrarnir segjast ekki hafa áhyggjur af plássleysi fjölgi enn frekar í fjölskyldunni.

Börn hjónanna heita öll nöfnum sem byrja á J. Þau eru: Joshua 19, John David 17, Janna 17, Jill 16, Jessa 14, Jinger 13, Joseph 12, Josiah 11, Joy-Anna 9, Jedidiah 8, Jeremiah 8, Jason 7, James 6, Justin 4, Jackson 3. Johannah 2 og hin nýfædda Jennifer.