Brown fundar með Bush í dag

Gordon Brown, nýr forsætisráðherra Bretlands, fundar með Bush Bandaríkjaforseta í dag. Brown reyndi fyrir ferðina að sannfæra Bandaríkjamenn um að hans koma í embættið myndi engu breyta í samskiptum þjóðanna.

Þetta er fyrsta ferð nýja forsætisráðherrans til Bandaríkjanna frá því að hann tók við embættinu af Tony Blair. Blair lagði mikla áherslu á góð samskipti milli þjóðanna tveggja og þótti mörgum honum hann jafnvel of hliðhollur Bush. Margir hafa velt fyrir sér hvernig samskipti þjóðanna komi til með að þróast eftir að nýr maður tók við hans embætti. Vangaveltur hafa verið uppi um hvort að forsætisráðherraskiptin í Bretlandi muni veikja sambandið á milli þjóðanna og hafa ráðherrar Brown jafnvel gefið það í skyn.

Brown reyndi hins vegar að sannfæra Bandaríkjamenn og umheiminn um annað fyrir fundinn. Við undirbúning ferðarinnar sagði Brown böndin milli Breta og Bandaríkjamanna enn sterk og að samband þjóðanna geti orðið enn betra á komandi árum. Þrátt fyrir að Brown haldi því fram að forsætisráðherraskiptin eigi ekki eftir að breyta neinu í samskiptum þjóðanna er enn óljóst hvort koma hans í embættið breyti einhverju um veru breskra hermanna í Írak og hvort hann kalli herlið Breta heim frá Írak á næstunni. Á fundi sínum í dag ætla Brown og Bush meðal annars að ræða Íraksstríðið en Bretar hafa verið helstu bandamenn Bandaríkjamanna í stríðinu. Í lok maí greindi breska dagblaðið Sunday Telegraph frá því að ráðgjafar George Bush bandaríkjaforseta í Hvíta húsinu telja að Brown kalli herlið Breta heim frá Írak næstunni.

Fundur þeirra Brown og Bush verður í sumarbústað forsetans í Camp David og síðar í dag fer Brown til New York þar sem hann hittir Ban Ki-moon aðalritara Sameinuðu þjóðanna.