Fann tönn í höfði sínu

Ástralski ruðningsleikmaðurinn Ben Czislowski fékk óvenjulega skýringu á höfuðverk sem hafði verið að ergja hann í fjóra mánuði. Höfuðverkurinn hófst eftir að Czislowski lenti í árekstri við leikmanninn Matt Austin og þurfti að láta sauma sár á höfði sínu. Þegar hann var orðinn þreyttur á verknum og fékk svo augnsýkingu í ofanálag leitaði hann til læknis, sem fann tönn hins leikmannsins í höfði hans.

Czislowski, sem leikur fyrir Wynnum liðið í Brisbane sagðist hlæja að þessu núna, en hann hefði haft áhyggjur þegar læknirinn sagði honum að mikil sýkingarhætta fylgdi tönnum. Þá sagði hann geyma tönnina á náttborðinu sínu og að Austin væri velkomið að fá hana aftur ef hann hefði áhuga.

Þetta er alls ekkert eindæmi í ruðningi, því fyrir þremur árum þurfti annar ástralskur leikmaður, Shane Millard, að láta fjarlægja tönn andstæðings úr höfði sínu. Árið 2002 lenti svo þriðji ástralski leikmaðurinn í því að fá svo slæma sýkingu í hendina að læknar óttuðust að þeir þyrftu að fjarlægja hana. Uppruni sýkingarinnar fannst þó að lokum, en hann var með tönn grafna í hendina.