Ástralir vara við hryðjuverkum

Áströlsk yfirvöld vara þegna sína við því að ferðast til Indónesíu vegna hryðjuverkahættu. Utanríkisráðuneytið varar ferðamenn sérstaklega við stöðum á borð við Bali og Jakarta sem það telur vera líkleg skotmörk. Sprengingar á næturklúbbum á Balí árið 2002 urðu 202 að aldurtila, þar af 88 áströlum.

Viðvörunin kemur þrátt fyrir að indónesískum stjórnvöldum hafi undanfarið tekist að góma háttsetta meðlimi islamska öfgahópsins Jemaah Islamiah, þar á meðal leiðtoga vopnaðs arms þeirra. Í viðvöruninni segir að hryðjuverkamenn haldi þó áfram að skipuleggja árásir. Þá segir að þeir Ástralíumenn sem þegar séu á Bali ættu að hugleiða að forða sér, eða í það minnsta fara afar varlega.

Fjöldi annarra hryðjuverkaárása hefur verið gerður í Indónesíu undanfarin ár. Sprengja sprakk í sendiráði Ástrala í Jakarta árið 2004, og árið 2005 var aftur sprengt á Bali. Þá létust 23, þar af voru fjórir Ástralar.