Vilja aftökur án dóms og laga

Meirihluti íbúa Gvatemala eru þeirrar skoðunar að lögregla og aðrir sjálfskipaðir baráttumenn gegn glæpum sé stætt á því að myrða glæpamenn án dóms og laga. Þetta kom fram í könnun dagblaðs sem sagt er það virtasta þar í landi. Landsmenn trúa því margir að þessháttar aðgerðir myndu draga úr glæpum í landinu.

Um sex þúsund manns voru drepnr af glæpamönnum í landinu í fyrra, en eiturlyfjaiðnaður er útbreiddur í Gvatemala. Það sem meira er, 98 prósent morðanna voru aldrei upplýst. Forsetakosningar verða haldnar í Gvatemala í september næstkomandi og öryggismál hafa verið ofarlega baugi í aðdraganda þeirra.

60 prósent þeirra sem þátt tóku í könnun dagblaðsins Siglo XXI sögðust fylgjandi „félagslegum hreinsunum" í landinu en það er heiti sem notað er yfir morð á glæpamönnum án dóms og laga.

Á síðustu fimm árum hefur tíðni morða í landinu aukist um hartnær sextíu prósent.