Leikir í undankeppni HM mega fara fram í 3000 metra hæð

Alþjóðaknattspyrnusambandið, FIFA, ákvað í dag að heimila landsleiki í undankeppni heimsmeistararmótsins í allt að 3000 metra hæð yfir sjávarmáli að ósk Knattspyrnusambands Suður-Ameríku.

FIFA hafði áður bannað að slíkir leikir færu fram í meira en 2500 metra hæð og vísaði til þess að knattspyrnumönnum stafaði hætta af því að spila í svo mikilli hæð og sagði að háfjallaloftið veitti þeim sem þar byggju ósanngjarnt forskot á mótherja sína.

Ásamt því að heimila leiki í allt að þriggja kílómetra hæð ákvað sambandið að boða til ráðstefnu í haust þar sem fjallað verður um hættur í leikjum sem fara fram við erfiðar aðstæður, eins og í mikill hæð eða miklum hita, kulda eða raka.

Hinar nýju reglur þýða að Kólumbíumenn geta nú spilað heimaleiki sína í undankeppni HM í Bogotá sem er í 2640 metra hæð og það sama geta Ekvadorar gert í Quito sem er í 2800 metra hæð. Hins vegar verða Bólivíumenn og Perúbúar að finna aðra leikstaði í sínum löndum en La Paz og Cuzco þar sem leikvangar þar eru í yfir 3400 metra hæð yfir sjávarmáli.