Rússar sagðir tregir til að samþykkja Blair sem sáttasemjara

Vesturveldunum gekk illa í dag að komast að samkomulagi um að tilnefna Tony Blair, fráfarandi forsætisráðherra Bretlands sem sáttasemjara í Mið-Austurlöndum. Búist var við því að „kvartettinn" svokallaði, en hann skipa fulltrúar frá Bandaríkjunum, Evrópusambandinu, Rússlandi og Sameinuðu Þjóðunum, myndi tilkynna um útnefningu Blairs sem aðalsáttasemjara í dag en sú ákvörðun hefur dregist, að minnsta kosti til morgundags.

Fréttastofa Reuters hefur eftir heimildarmönnum sínum að ástæða seinkunarinnar sé sú að Rússar séu efins um um að Blair sé rétti maðurinn til þess að stýra friðarviðræðum á milli stríðandi fylkinga fyrir botni Miðjarðarhafs. Fulltrúi Evrópubandalagsins í ráðinu segir að Blair sé sá eini sem til greina komi í stöðuna eins og er, en að enn sé beðið samþykkis Rússa.

Samskipti Rússa og Breta hafa verið stirð upp á síðkastið vegna rannsóknar breskra yfirvalda á dauða Litvinenkos, fyrrverandi rússnesks njósnara sem myrtur var í London.