Fjórtán mánaða fangelsi fyrir lífshættulega líkamsárás

Héraðsdómur Reykjavíkur hefur dæmt 22 ára karlmann í 14 mánaða fangelsi fyrir stórfellda líkamsárás á Rauða ljóninu á Eiðistorgi á Seltjarnarnesi í júní í fyrra.

Maðurinn var ákærður fyrir að hafa slegið fórnarlamb sitt í höfuðið þannig að það féll í gólfið. Árásarmaðurinn lét það ekki nægja heldur sparkaði í og steig á höfuð fórnarlambsins þannig að það fékk dreift heilamar.

Fram kemur í dómnum að maðurinn sem varð fyrir árásinni hafi verið fluttur meðvitundarlaus á sjúkrahús og að áverkar á heila hafi næstum orðið honum að bana.

Réttargæslumaður fórnarlambsins lagði fram rúmlega fimm milljóna króna skaðabótakröfu á hendur árásarmanninum en dómurinn vísaði henni frá þar sem hún þótti vanreifuð.