Gaddafi hvetur til stofnunar Bandaríkja Afríku

Forseti Líbíu, Muammar Gaddafi hefur heitið því að berjast fyrir því að sameina ríki Afríku undir einni ríkisstjórn. Í ræðu sem hann hélt í Gíneu í dag sagði hann að sjálfstæð ríki í álfunni ættu sér enga framtíð, eina lausnin fælist í sameinaðri Afríku.

Bandalag Afríkuríkja hittist á fundi í Gana í næsta mánuði og hvetur forsetinn kollega sína í öðrum ríkjum til þess að taka á fundinum ákvörðun um að stofna Bandaríki Afríku. Gaddafi hefur lengi barist fyrir hugmyndinni en flestir stjórnmálaskýrendur eru á því að hún sé ekki raunhæf, að því er BBC greinir frá.

„Á fundinum í Accra ætlum við að koma okkur beint að efninu og þeir sem eru ekki á okkar skoðun geta komið sér í burtu," sagði Gaddafi í Gíneu í dag. „Í fjörutíu ár hafa fundir bandalagsins engan árangur borið og örríki Afríku eiga sér enga framtíð," sagði forsetinn að síðustu.