Stjórn Alþóðabankans samþykkir tilnefningu Zoellicks

Robert Zoellick hefur fengið blessun stjórnar Alþjóðabankans og mun hann því taka við af Paul Wolfowitz sem forseti bankans. Zoellick var tilnefndur af George Bush Bandaríkjaforseta og hann mun setjast á forsetastól 30. júní næstkomandi.

Wolfowitz lætur af störfum eftir tveggja ára setu í embætti en hann neyddist til að segja af sér í skugga hneykslismáls sem varðaði kærustu hans sem starfaði hjá bankanum.

Zoellick var áður aðstoðarmaður Condoleezu Rice, utanríkisráðherra Bandaríkjanna. Kjörtímabil forseta Alþóðabankans er fimm ár og er forseta heimilt að sækja um endurkjör.