Milljónir dýra lifðu af borgarastríð í Suður-Súdan

Vísindamenn að störfum í Suður-Súdan eru gáttaðir eftir að hafa rannsakað dýralíf á svæðinu. Milljónir villtra dýra sáust í könnunarflugi vísindamannanna, þar á meðal mikill fjöldi antílópa og fíla.

Þetta þykir merkilegt fyrir þær sakir að stríð geisaði í héraðinu í yfir tvo áratugi og miðað við reynsluna annars staðar í Afríku hefur slíkt haft mikil áhrif á dýrastofna.

Haft er eftir stjórnanda rannsóknarinnar á vef samtakanna Wildlife Conservation Society að hann hafi aldrei séð annan eins fjölda dýra, ekki einu sinni í hinu reglulega flakki dýrahjarða á Serengeti-sléttunni í Tansaníu og Keníu.

Vísindamenn fylgdust með dýrahjörðum í Suður-Súdan árið 1982, ári áður en borgarstríð braust þar út. 25 árum síðar var sama svæði rannsakað með sömu aðferð og kom í ljós að stríðið hafði haft lítil áhrif á dýrastofna þar ólíkt því sem gerðist í Mósambík og Angóla þar sem villt dýralíf þurrkaðist út á sumum svæðum í áralöngum styrjöldum.

Vísindamennirnir hyggjast nú vinna að því ásamt yfirvöldum í Súdan að varðveita dýrastofnana. Hugmyndin er sú að flytja þúsundir fyrrverandi hermanna úr Frelsisher Súdans á svæðið og bjóða þeim vinnu við að gæta dýranna fyrir veiðiþjófum og reka á svæðinu þjóðgarða. Óska samtökin Wildlife Conservation Socitey eftir framlögum til að styðja við uppbyggingu og varðveislu fjölbreytileika náttúrunnar í Suður-Súdan.