Stígamót fá starfsmannasjóð Engeyjar að gjöf

Áhöfnin á Engey RE 1 sem taldi 48 manns, hefur afhent Stígamótum starfsmannasjóð sinn, rúma hálfa milljón króna. Engey var nýverið seld úr landi, í kjölfarið var starfsmannafélagið leyst upp, og ákváðu skipverjarnir fyrrverandi að gefa Stígamótum sjóðinn.

Kristján E. Gíslason var á Engeynni og var stýrimaður og síðar skipstjóri skipsins. „Við vorum búnir að safna þessum peningum í tvö ár þegar skipið var selt úr landi," segir Kristján í samtali við Vísi. „Okkur í áhöfninni fannst einfaldlega gáfulegra styrkja gott málefni í stað þess að fara út að borða fyrir peninginn." Kristján segir Stígamót vel að gjöfinni komin. „Þetta eru samtök sem hafa unnið ötullega að vakningu í þessu gríðarlega mikilvæga máli sem baráttan gegn kynferðisofbeldi er." Að sögn Kristjáns var gjöfin einnig hugsuð í aðra röndina til þess að vekja athygli á þessum málum. „Vonandi fylgja fleiri í fótspor okkar."

„Slíkur stuðningur er ómetanlegur fyrir starfsemi Stígamóta," segir Guðrún Jónsdóttir, talskona Stígamóta. „Ekki bara vegna þess að fjármagn er nauðsynlegt til reksturs og samfélagsvinnu, heldur líka vegna þess móralska stuðnings sem í gjöfinni felst."