Íbúar við Njálsgötu hóta lögbanni og málsókn á hendur borginni

Starfsmenn Velferðarsviðs stóðu ófaglega að vali á húsnæði þegar þeir ákváðu að opna heimili fyrir heimilislausa að Njálsgötu 74 í Reykjavík að mati íbúa í hverfinu. Fulltrúar Velferðarsviðs og íbúa funduðu í síðustu viku en þar mótmæltu íbúar harðlega fyrirhugaðri opnun heimilisins. Hóta þeir nú lögbanni og málsókn á hendur borginni náist ekki sátt í málinu.

„Fólk er byrjað að flýja hverfið vegna þessa," sagði Pétur Gauti Svavarsson, íbúi við Njálsgötu, í samtali við Vísi. Það verður að stoppa hér. Hverfið þolir ekki fleiri óreglumenn."

Íbúar mótmæla

Velferðarsvið borgarinnar undirbýr nú opnun á heimili fyrir heimilislausa að Njálsgötu 74 í miðbæ Reykjavíkur. Ekki eru allir Íbúar á svæðinu hlynntir þessum rekstri og hafa þeir lagt fram formleg mótmæli til borgaryfirvalda.

Fulltrúar Velferðarsviðs og íbúa funduðu á fimmtudaginn í síðustu viku og þar lögðu íbúar meðal annars fram undirskriftarlista með nöfnum 127 íbúa á svæðinu þar sem heimilinu er mótmælt. Ennfremur lögðu fulltrúar íbúa fram minnisblað frá lögmannsskrifstofunni Lex þar sem því er meðal annars haldið fram að borgin þurfi að fara með starfsemi heimilisins í grenndarkynningu.

Lögðu fram sáttatillögu

Á fundinum lögðu fulltrúar Velferðarsviðs fram sáttatillögu sem fól meðal annars í sér breytingar á fyrirhuguðum rekstri heimilisins. Þannig á að fækka liðsmönnum úr tíu í átta. Öryggismyndavélum mun verða komið upp í götunni og sérstakur starfsmaður hafður til að leita að sprautum og öll löggæsla í hverfinu efld. Þessu höfnuðu fulltrúar íbúa.

Fullkomlega óásættanlegt

Pétur segir sáttatillöguna sýna, svo ekki verð um villst, að hér sé um annars konar rekstur að ræða en bara heimili. „Þetta hljómar eins og við séum að fá fangelsi í götuna. Þetta er fullkomlega óásættanlegt fyrir íbúa og sýnir með skýrum hætti að hér er um stofnun að ræða en ekki heimili. Fólk vill ekki búa með börnum sínum í svona umhverfi."

Fulltrúar Velferðarsviðs og íbúa funda aftur í næstu viku. Pétur segir það ósk íbúa að sátt náist í málinu. „Náist ekki sátt munum við biðja um lögbann á þessari starfsemi og fara í mál við borgina. Í okkar hugum hafa starfsmenn Velferðarsviðs staðið mjög ófaglega að málum. Bæði í vali á húsnæði sem og í samskiptum sínum við íbúa á svæðinu."