Skrá boltabullur í gagnagrunn í Danmörku

Von er á lagafrumvarpi í Danmörku sem heimilar yfirvöldum að skrá allar fótboltabullur í landinu í sameiginlegan gagnagrunn. Fram kemur á vef Politiken að markmiðið sem slíkum gagnagrunni sé að útiloka allar bullur frá dönskum knattspyrnuleikjum en þær hafa látið til sín taka undanfarin misseri.

Síðast í gær hafði lögregla afskipti af bullum sem gengu berserksgang á áhorfendapöllum í sýningarleik Bröndby og AaB á Borgundarhólmi. Þá hljóp áhorfandi inn á völlinn í leik í annarri deild dönsku deildakeppninnar í dag og spreiaði piparúða í andlitið á markmanni annars liðsins. Ákvað dómarinn að flauta leikinn af vegna þessa.

Lene Espersen hefur áður sagt að bulluhegðun verði ekki liðin á dönskum völlum. Koma verði í veg fyrir að saklaust fólk slasist við það eitt að bregða sér á völlinn.