Allt strand hjá SAS

Engin lausn virðist í sjónmáli í deilu skandinavíska flugfélagsins SAS og flugliða þess í Svíþjóð. Samningafundur deiluaðila stóð yfir fram á nótt en bar ekki árangur. Verkfallið heldur því áfram í dag, en fulltrúar flugliða munu funda með baklöndum sínum og ákveða með framhald aðgerðanna.

Um 800 sænskir flugliðar taka þátt í verkfallinu. Það hófst á föstudag og hefur valdið um 50 þúsund flugfarþegum óþægindum. Lágmarksþjónustu flugfélagsins hefur verið haldið uppi milli Kaupmannahafnar og Stokkhólms, en ekki frá öðrum völlum í Svíþjóð. Deilt er um bætt vinnuskilyrði meðal annars tengt lengri matar- og hvíldartíma.