Óljóst orðalag í yfirlýsingu um Írak

Ísland verður ekki tekið af lista yfir þær þjóðir sem studdu innrásina í Írak þó það hafi verið skýr vilji verðandi utanríkisráðherra í kosningabaráttunni. Ný ríkisstjórn harmar stríðsreksturinn í Írak en forstöðumaður Alþjóðamálastofnunar Háskóla Íslands segir að yfirlýsingin sé óljós.

 

 

Íslendingar eru á lista Bandaríkjamanna yfir svokallaðar staðfastar stuðningsþjóðir innrásarinnar í Írak. Sú ákvörðun stjórnar Sjálfstæðismanna og Framsóknarflokks hefur verið umdeild. Á landsfundi Samfylkingarinnar fjórtánda apríl síðastliðinn var Ingibjörg Sólrún Gísladóttir, formaður og verðandi utanríkisráðherra, ómyrk í máli þegar hún lýsti Íraksmálinu sem fleini í holdi þjóðarinnar, siðlausri ákvörðun sem hefði verið tekin í óðagoti. Þá sagði hún að það ætti að verða fyrsta verkefni nýrrar ríkisstjórnar að taka Ísland af lista hinna vígfúsu þjóða.

 

 

Í stefnuyfirlýsingu Sjálfstæðisflokks og Samfylkingar, sem kynnt var í dag, segir að ný ríkisstjórn harmi stríðsreksturinn í Írak og vilji leggja sín lóð á vogarskálar friðar í Írak og Miðausturlöndum, meðal annars með þátttöku í mannúðar- og uppbyggingarstarfi.

 

 

Þegar stefnuyfirlýsingin var kynnt sagði Ingibjörg Sólrún að ný ríkisstjórn væri að horfa til framtíðar en ekki til fortíðar og vísaði síðan í stefnuyfirlýsinguna þar sem segir að ríkisstjórnin harmi stríðsreksturinn í Írak.

 

 

Geir sagði á Þingvöllum í dag að stjórnin sé sammála um að láta ekki atburði liðins tíma hafa áhrif á núverandi samstarf. Hann bætti því við að auðvitað harmi þau það ástand sem nú sé uppi í Írak.

 

 

Silja Bára Ómarsdóttir, forstöðumaður Alþjóðamálastofnunar Háskóla Íslands, segir að ekki verði annað séð en að Samfylkingin hafi gefið eftir en það hafi Sjálfstæðisflokkurinn líka gert fyrst að þetta hafi komist á blað. Yfirlýsingin sé óljós - svigrúm sé til túlkunar enda stefna til næstu fjögurra ára sem ekki sé ljóst hvernig verði framkvæmd.

 

 

Silja segir að með því að segja aðeins að stríðsreksturinn sé harmaður sé ekki ljóst hvort átt sé við stríðsrekstur Bandaríkjamanna í landinu eða þá borgarastyrjöld sem nú geysar þar.