Allir bannfærðir

Benedikt páfi sextándi segist sammála því að mexíkóskir stjórnmálamenn sem studdu lög sem leyfa fóstureyðingu verði bannfærðir. Slík lög voru sett í Mexíkóborg fyrir skömmu. Páfi lét þessi orð falla um borð í flugvél sem var að flytja hann í sína fyrstu pílagrímsferð til Suður-Ameríku.

Talsmaður páfa útskýrði síðar að þeir sem hefðu greitt atkvæði með lögunum hefðu sjálfkrafa bannfært sig með þeirri gjörð.

Kirkjunnar menn í Mexíkó hafa sagt að læknar og hjúkrunarkonur sem eyði fóstrum verði öll bannfærð. Sömuleiðis konur sem færu í fóstureyðingu.