Erdogan fullvissar Evrópuþjóðir um að lýðræði verði virt í Tyrklandi

Tayyip Erdogan, forsætisráðherra Tyrklands, fullvissaði aðildarþjóðir Evrópusambandsins í kvöld að ástandið í Tyrklandi myndi róast í kjölfar þess að stjórnlagadómstól úrskurðaði að skipan nýs forseta væri ógild. Mikil ólga hefur verið Tyrklandi og blossuðu upp óeirðir í Istanbúl í dag.

Í yfirlýsingu sinni sagði Erdogan að tyrknesk stjórnvöld myndu virða lýðræðislegt fyrirkomulag í vali á nýjum forseta. Deilt er um Abdullah Gul, dómsmálaráðherra, sem sækist eftir embættinu. Margir Tyrkir óttast að verði hann fyrir valinu verði skilin milli stjórnmála og trúarbragða í Tyrklandi óskýrari. Gul er frambjóðandi stjórnarflokks Erdogans forsætisráðherra.

Óeirðirnar hafa valdið því að gengi hlutabréfa á tyrkneskum mörkuðum hefur fallið verulega frá því í gær. Þá hefur gengi tyrknesku lírunnar einnig lækkað á síðustu tveimur dögum. Er yfirlýsing Erdogans talin til marks um viðleitni forsætisráðherrans til að róa erlenda fjárfesta en þeir hafa haldið að sér höndum vegna ólgunnar í landinu.