Dýrkeypt að mjólka of mikið

Ítalskir kúabændur þurfa að greiða 17,6 milljarða sekt til Erópusambandsins fyrir að framleiða mjólk umfram þá kvóta sem þeim hafði verið úthlutað. Þetta kemur fram á heimasíðu Landssambands íslenskra kúabænda. Hvert land innan ESB hefur ákveðinn mjólkurkvóta og gilda strangar reglur um að ekki megi framleiða umfram það magn sem hann segir til um.

Við uppgjör á framleiðslu síðasta árs kemur á daginn að ítalskir kúabændur hafa framleitt 640 þúsund tonn  umfram landskvóta Ítalíu. Fyrir það verða þeir að greiða 200 milljónir evra, eða 17,6 milljarða króna í sekt til ESB. Það jafngildir um 27,5 krónum á lítra. Á heimasíðu kúabænda er bent á til samanburðar að Danir framleiddu á sama tíma um 28.500 tonn umfram landskvóta. Þetta er hinsvegar ekkert nýtt hjá ítölskum bændum því þetta magn umfram kvóta hefur verið nokkuð stöðugt undanfarin ár.