Villa: Mitt hlutverk að nýta færin

Spænski landsliðsframherjinn David Villa hjá Valencia segir að hann og hans menn séu meira en klárir í slaginn við Chelsea í Meistaradeildinni á miðvikudagskvöldið. Leikurinn verður sýndur beint á Sýn Extra klukkan 18:30.

"Ég er farinn að skora grimmt og liðið er á sigurbraut, svo við ættum að vera tilbúnir í slaginn í London. Þetta er mjög mikilvægur tímapunktur á tímabilinu fyrir okkur og við vitum að við verðum að eiga okkar besta leik gegn Chelsea," sagði Villa, sem er enn á ný á meðal markahæstu manna í spænsku deildinni.

"Chelsea er með mjög sterkan leikmannahóp og góðan þjálfara sem vill vinna hvern einasta leik. Ég verð því að vera tilbúinn ef ég fæ góð færi í leiknum, því mitt hlutverk er að nýta færin okkar. Þetta verður mjög erfitt verkefni gegn einu af sterkustu liðunum í keppninni, en ég veit að við höfum það sem þarf til að komast í undanúrslitin," sagði Villa. Valencia verður að spila án félaga hans Fernando Morientes í framlínunni, en sá meiddist illa í leik Spánverja og Íslendinga í undankeppni EM á dögunum.