Bayern heldur í vonina

Þýskalandsmeistarar Bayern Munchen eiga enn veika von um að verja titilinn í vor eftir góðan 2-0 sigur á toppliði Schalke í dag. Bayern er nú taplaust í átta heimaleikjum í röð og er í fjórða sæti. Schalke hefur sex stiga forystu á meistarana en hefur aðeins unnið einn af síðustu sex leikjum sínum. Bremen náði aðeins jafntefli gegn Cottbus og er í öðru sætinu, tveimur stigum á eftir Schalke.

Bayern átti draumabyrjun gegn Schalke í dag þegar Roy Makaay kom liðinu yfir eftir aðeins 170 sekúndur. Þetta var 100. mark hollenska framherjans fyrir Bayern. Það var svo Hasan Shalihamidzic sem tryggði sigurinn með laglegu marki skömmu fyrir leikslok.