Hæ, þetta er Heather

Breska lögreglan hefur varað Heather Mills, brátt fyrrverandi eiginkonu Sir Pauls McCartneys, við því að hringja of oft í neyðarnúmer lögreglunnar til þess að kvarta undan ljósmyndurum. Talsmaður lögreglunnar upplýsti ekki hversu oft hún hefði hringt, en sagði að í nokkur skipti hafi lögreglan farið að heimili hennar og talið þá ferð ástæðulausa.

Talsmaðurinn sagði að lögreglunni bæri skylda til að bregðast við hjálparbeiðnum, en það væri hætta á því að ef of oft væri kallað frá einum stað, færi það eins og með drenginn sem hrópaði; "Úlfur, úlfur."

Heather Mills hefur raunar verið iðin við að veita fjölmiðlum viðtöl, meðal annars til þess að auglýsa þáttöku sína í nýjum raunveruleikaþætti.

Það eru þó aðallega erlendir fjölmiðlar sem hún talar við og notar þá gjarnan tækifærið til þess að hallmæla breskum fjölmiðlum, sem hún telur draga taum eiginmanns síns, í skilnaðarmáli þeirra.