Henrik prins vill verða kóngur

Danskir fjölmiðlar segja nokkuð háðskir frá því að Henrik prins, eiginmaður Margrétar Þórhildar drottningar vilji fá konungstitil. Prinsinn hafði orð á þessu í viðtali við franska blaðið Point de Vue. Prinsinn vísar til jafnréttis karla og kvenna. Kona sem í dag kvænist konungi fái titilinn drottning. Karlmaður fái hinsvegar ekki konungstign við að kvænast drottningu.

Henrik segir að í sínu tilfelli sé tilhneigingin sú að líta aðeins til drottningarinnar. Það skekki samband hjónanna, ekki í einkalífinu, heldur á opinberum vettvangi. Prinsinn hefur áður lýst óánægju með stöðu sína í Danmörku. Hann var til dæmis ósáttur við að þegar Margrét drottning var um tíma fjarverandi vegna veikinda var það Friðrik krónprins en ekki hann sjálfur sem tók við opinberum störfum hennar.