Jóakim sá brúðkaupið í sjónvarpi

Jóakim Danaprins viðurkenndi fyrir fréttamönnum að hann hefði séð brúðkaup Alexöndru, fyrrverandi eiginkonu sinnar, í sjónvarpi. Prinsinn var staddur í Álaborg þar sem hann var að veita ungum vísindamönnum verðlaun fyrir uppgötvanir. Blaðamenn vildu hins vegar ekkert um verðlaunin vita en spurðu prinsinn látlaust um brúðkaupið.

Jóakim margsagði að hann myndi ekki svara neinum spurningum nema þeim sem tengdust erindi hans til Álaborgar en allt kom fyrir ekki enda voru margir erlendir blaðamenn viðstaddir athöfnina. Loks gafst prinsinn upp þegar hann var spurður hvort hann hefði ekki að minnsta kosti séð brúðkaupið í sjónvarpi eins og allir aðrir Danir. „Auðvitað gerði ég það,“ sagði hann. Við það urðu menn að sætta sig um það mál.