Málverk ranglega eignað Van Gogh

Málverk sem hefur alla tíð verið eignað listmálaranum Vincent van Gogh er alls ekki úr smiðju meistarans. Þrálegar skoðanir hollenskra sérfræðinga á verkinu leiddu til þessarar niðurstöðu. Ekki er vitað hver málaði.

Efasemdir um höfund verksins vöknuðu þegar það var til sýnis á safni í Edinborg í ágúst á síðasta ári. Þá benti gagnrýnandi nokkur á að stíll verksins samræmdist ekki öðrum verkum van Gogh frá því tímabili sem það var talið vera málað á. Þá minnist Gogh hvergi á verkið í fjölmörgum bréfaskrifum sínum. Eftir sýninguna í Edinborg var verkið sent til Amsterdam til skoðunar.

Málverkið ber titilinn Head of a Man, eða Mannshöfuð, og sýnir hrokkinhærðan skeggjaðan karlmann á ljósbrúnum grunni.

Verkið hefur verið varðveitt á Viktoríusafninu í Ástralíu síðan árið 1939. Það hefur hingað til verið metið á 1,3 milljarða íslenskra króna. Allsóvíst er hvort sá prís haldist eftir uppgötvunina.