Svíþjóð þarf nýja ríkisstjórn, segir Sahlin

Svíar þurfa ekki nýjar eða gamlar hófsemishugmyndir heldur nýja ríkisstjórn, sagði Mona Sahlin, sem í dag var kosin formaður sænska Jafnaðarmannaflokksins á landsfundi í Stokkhólmi.

Sahlin er fyrsta konan sem gegnir embættinu í 118 ára sögu flokksins en hann hefur haldið um stjórnartaumana stærstan hluta síðustu sjö áratugi. Flokkurinn tapaði hins vegar í kosningum í september í fyrra og þá boaði Göran Persson, formaður flokksins, afsögn sína.

Í ræðu sinni dag sagðist Sahlin mjög stolt að vera fyrsta konan til þess að leiða flokkinn. Hún benti á að flokkurinn hefði nú þrjú og hálft ár til að skerpa á hugmyndum jafnaðarstefnunnar fyrir næstu þingkosningar.

Meðal heiðursgesta á landsfundi Jafnaðarmannaflokksins í Svíþjóð er Ingibjörg Sólrún Gísladóttir, formaður Samfylkingarinnar, en hún ávarpaði samkomuna. Fram kom í máli hennar að þetta væri stór dagur fyrir jafnréttisbaráttuna og fyrir lýðræðið. Það samfélag sem byggði á reynslu bæði kvenna og karla væri sterkara og réttsýnna en samfélag sem ekki nýtti til fullnustu þann mannauð sem býr í báðum kynjum.

Ingibjörg Sólrún gerði málefni barna að sérstöku umtalsefni og sagði það vera hálfkarað og ófullkomið samfélag sem ekki tæki mið af sjónarmiðum og þörfum barna.