Bifreið við Hyde Park tengist rannsókn á bílsprengju í nótt

Lögregla í Bretlandi hefur lokað götunni Park Lane við Hyde Park  Í Lundúnum vegna grunsamlegs bíls við götuna.  Frá þessu greindi Sky-fréttastöðin  og hefur eftir heimildarmönnum sínum að bifreiðin tengist rannsókn á bílsprengju sem fannst nærri Piccadilly Circus í nótt. Talið er að sprengja hafi átt hana með farsíma.

Það var skömmu eftir miðnætti í nótt að íslenskum tíma sem sjúkrabíll var kallaður að Tiger Tiger, vel þekktum næturklúbbi í Haymarket nærri Piccadilly Circus og Leicester Square í Lundúnum. Sinna þurfti veikum gesti þar. Sjúkraliðar urðu varir við það sem þeir töldu reyk í silfurgrárri Mercedes Benz bifreið sem hafði verið lagt nærri næturklúbbnum.

Lögregla var kölluð á vettvang sem opnaði bílinn og fann í honum fjölmörg ílát full af bensíni, mörg gashylki og töluvert af nöglum. Svæðið var þegar girt af og sprengjusérfræðingar Lundúnalögreglunnar kallaðir á vettvang. Þeir gerðu sprengjuna óvirka.

Neyðarnefnd breska ríkisins, COBRA, kom saman til fundar í morgun vegna málsins. Fyrir fundinn hvatti Gordon Brown, forsætisráðherra, landa sína til að vera á verði. Öryggisgæsla hefur verið hert í borginni og gæsla við þinghúsið efld til muna.