Hæstiréttur ákveður að fjalla um rétt fanga í Guantanamo

Bandaríkjastjórn varð fyrir enn einu áfallinu í stríði sínu gegn hryðjuverkum í dag þegar Hæstiréttur Bandaríkjanna ákvað að taka fyrir mál fanga í Guantanamo-búðunum sem snýr að því hvort þeim sé heimilt að láta taka mál sín upp fyrir alríkisdómstólum.

Dómurinn sneri þannig úrskurði sínum frá því í apríl þegar hann neitaði að skera úr um hvort föngunum væri heimilt að gera þetta. Var það fyrir tilstilli verjenda fanganna sem báðu dóminn að endurskoða úrskurð sinn.

Bandaríkjastjórn setti í fyrra lög sem bönnuðu föngum í Guantanmo að fara með mál sín fyrir alríkisdómstóla. Kom stjórnin á fót herdómstól í búðunum sem fjalla á um meinta glæpi mannanna.

Bandaríkjastjórn hefur skilgreint hermennina sem óvinastríðsmenn þannig að ákvæði Gefnarsáttmálans um meðferð fanga gildi ekki um þá. Ítrekað hafa komið fram ásakanir um að fangarnir í Guantanamo sæti pyntingum en nokkur hundruð manna hafa setið í fangelsi þar undanfarin ár án þess að hafa verið ákærðir.

Búist er við að mál fanganna verði tekin fyrir í október næstkomandi.