Kristinn áfram hjá KR og Tryggvi líklega einnig

Kristinn Jóhannes Magnússon skrifaði í fyrradag undir nýjan þriggja ára samning við KR og Tryggvi Bjarnason á í viðræðum um nýjan samning hjá sama félagi.

Báðir eru þeir uppaldir KR-ingar og sögðu í samtali við Vísi að þeir vilji vera áfram hjá KR.

„Ég vona að ég verði áfram hjá KR," sagði Tryggvi. „Við höfum rætt nýjan samning undanfarna daga og er þetta allt í áttina."

Kristinn skrifaði undir sinn samning í fyrradag og líst vel á framhaldið. „Mér líst mjög vel á þá Loga Ólafsson sem þjálfara og Rúnar Kristinsson í stöðu yfirmanns knattspyrnumála. Stefnan verður auðvitað sett hærra en síðasta sumar og verður gaman að taka þátt í því."

Hann býst þó við því að einhverjar frekari breytingar verði á leikmannahópi KR næstu dagana og vikurnar.

„Hjá mér var KR alltaf fyrsti kostur og komst það aldrei á það stig að ég fór að ræða við önnur félög," sagði Kristinn.

Hann segir að það hafi verið breyting til batnaðar þegar Logi tók við Teiti Þórðarsyni um mitt sumar.

„Hann kom okkur allavega úr fallsæti og náði að útrýma ákveðinni þreytu sem var kominn í mannskapinn. Það var öllu léttari bragur á því sem hann gerði og hann kom með ferska vinda inn í liðið."