Danir vilja sjálfstæði Grænlands

Þrír af hverjum fjórum Dönum vilja að Grænlendingar fái fullt sjálfstæði. Þetta kemur fram í nýrri könnun sem birt var á vef danska blaðsins Politiken. Sextíu og þrjú prósent segjast vilja að Grænlendingar ráði sjálfir yfir málmi olíu og örðum auðlindum sem finnast á grænlenskum hafsbotni.

Fyrri kannanir hafa sýnt að áttatíu prósent Grænlendinga vilja sjálfstæði frá Dönum. Sérfræðingar sem blaðið ræddi við segja þó ólíklegt að Grænlendingar geti lýst yfir sjálfstæði á næstunni nema með fjárstuðningi frá Dönum. Grænlendingar taka á ári hverji við milljörðum króna frá Dönum sem meðal annars fara í það að reka heilbrigðiskerfið.