Aftur boðað til mótmæla á Norðurbrú í kvöld

Ungmenni í Kaupmannahöfn ætla að halda mótmælaaðgerðum áfram í kvöld til að knýja á um nýtt Ungdómshús. Í gærkvöldi voru rúmlega 60 manns handteknir í óeirðum á Norðurbrú. Umfang átakanna komu dönsku lögreglunni í opna skjöldu.

Lögreglan líkir nóttinni við mótmælin sem urðu þegar Ungdómshúsið á Norðurbrú var rifið fyrir hálfu ári. Yfirmaður í dönsku lögreglunni segir að færri einstaklingar hafi nú valdið jafn miklum skaða og þá.

Þúsund ungmenni söfnuðust saman til að ítreka ósk sína um nýtt Ungdómshús, og kvarta yfir aðgerðaleysi stjórnvalda síðasta hálfa árið. Fljótlega fór allt í bál og brand. Mótmælendur tepptu umferð, kveiktu bál, brutust inní verslanir, rifu vörur út á götu og kveiktu í. Múrsteinum og bensínsprengjum var kastað að lögreglu.

Slökkviliðið í Kaupmannahöfn slökkti tuttugu og þrjú bál í borginni. Íbúar á Norðurbrú þurftu sjálfir að slökkva elda til að verja bíla sína og aðrar eigur.

Tveir hinna handteknu eru yngri en fimmtán ára, en alls voru sextíu og þrír handteknir í nótt. Aðeins þrír verða leiddir fyrir dómara vegna kröfu um gæsluvarðhald.

Strangar kröfur eru gerðar til lögreglu um sönnunargögn um þátt fólks í mótmælum, eftir gagnrýni á fjöldahandtökur í átökunum fyrir hálfu ári. Danska lögreglan telur sig ekki hafa haldbær gögn til að fara fram á varðhald yfir fleirum að þessu sinni.