Aukið samstarf við Bandaríkin verði Sarkozy forseti

Frakkar velja sér nýjan forseta á morgun eftir tólf ára setu Jacques Chirac í embætti. Síðustu kannanir sýna að Nicolas Sarkozy hafi forskot á keppninaut sinn Segolene Royal. Búast má við auknu samstarfi milli Frakklands og Bandaríkjanna verði Sarkozy fyrir valinu.

Frakkland er stórþjóð í Evrópu og eitt af fimm fastaríkjunum í öryggisráði Sameinuðu þjóðanna. Frakkar eru jafnframt kjarnorkuveldi og eitt öflugasta ríki Evrópusambandsins. Það skiptir því máli fyrir alþjóðasamfélagið hvaða forseta Frakkar velja sér.

Ef marka má síðustu skoðanakannanir á Royal talsvert á brattann að sækja en í könnun dagblaðsins Le Monde sem birt var í gær segjast 53 prósent aðspurðra ætla að kjósa Sarkozy en 47 prósent Royal.

Oft er litið á Frakkland sem ákveðið mótvægi við Bandaríkin en samskipti ríkjanna hafa verið stirð á köflum. Eiríkur Bergmann Einarsson, forstöðumaður Evrópufræðaseturs Háskólans á Bifröst, segir ljóst að það skipti máli hvort Sarkozy eða Royal verði fyrir valinu. Eiríkur telur að ef Sarkozy verði forseti þá muni samstarf milli Frakklands og Bandaríkjanna aukast en verði Royal forseti muni hún aftur á móti halla sér meira að klassísku Evrópusamstarfi.