Eiginkonan til sölu fyrir fimmtíu dali

Stjórnvöld í Brasilíu hafa skipað uppboðsvef þar í landi að fjarlægja auglýsingu þar sem maður að nafni Breno býður 35 ára gamla eiginkonu sína til sölu fyrir fimmtíu Bandaríkjadali, eða sem nemur um þrjúþúsund og tvöhundruð krónum. Þetta kemur fram á fréttavef CNN.

Maðurinn bar mikið lof á konu sína í auglýsingunni, lýsti líkamlegu atgervi hennar og sagði hana virði þyngdar sinnar í gulli. Þá væri hún bæði heimilisleg og góður félagi.

Yfirvöld skipuðu uppboðsvefnum, sem er að hluta í eigu Ebay, að fjarlægja auglýsinguna á föstudag, þar sem hún bryti í bága við þarlend lög sem banna sölu á líffærum, fólki, blóði, beinum og húð.

Þá kemur fram að ekki sé ljóst hvort auglýsingin hafi verið grín, en hún hafði þó verið fjarlægð af uppboðsvefnum á laugardag. Talsmenn uppboðsvefsins sögðust ekki hafa vitað af þessari meintu kvennasölu. Nærri ein milljón auglýsinga væri á þessum tiltekna uppboðsvef og ómögulegt væri að fylgjast með þeim öllum.

Maðurinn gaf einfaldar skýringar á því hvers vegna hann vildi selja konu sína. Hann sagðist virkilega þurfa á peningunum að halda.