Ágúst fer frá KR en hættir ekki

Ágúst Gylfason verður ekki áfram hjá KR en það staðfesti hann í samtali við Vísi. Hann mun þó ekki leggja skóna á hilluna enn sem komið er.

„Það er nánast öruggt að ég verði ekki áfram hjá KR. Ég veit ekki hvað tekur við en ég er með nokkur járn í eldinum. Ég veit alla vega að ég hætti ekki," sagði Ágúst.

Hann hefur undanfarin ár verið orðaður við þjálfarastöður víða og hafnaði hann til að mynda boði Reynismanna í Sandgerði um að taka að sér þjálfun liðsins.

Ágúst sagði að hann ætti í viðræðum við nokkur lið um að gerast aðstoðarþjálfari ásamt því að spila með viðkomandi liði.

Ágúst gekk til liðs við KR frá Fram eftir tímabilið árið 2003 og á hann að baki 47 leiki í deild og bikar með KR. Hann skoraði í þeim leikjum sex mörk.