Kynþokki Eiríks þykir ærandi

Flestir spá Úkraínu sigri í Söngvakeppni Evrópskra sjónvarpsstöðva í ár. Lagið þykir ekki það besta en dragdrottningin sem það syngur nær athygli allra. Flutningur Eiríks Haukssonar þykir hrífandi en það eru kyntöfrar hans sem helst eru til umræðu í tengslum við framlag Íslendinga.

Kynþokki Eiríks Haukssonar er mikið til umræðu meðal fjölmiðla- og áhugafólks á Evróvisjón í Helsinki. „Það er alltof mikið af einhverjum píslum þarna, Íslendingurinn er eini sem geislar af alvöru karlmennsku á sviðinu. Slíkt hefur lengi vantað," varð Ninu Talmén, finnskri blaðakonu, að orði í samræðum blaðamanna og áhugamanna um keppendur í fjölmiðlahöll keppninnar. Undir þau orð tóku aðrir heilshugar undir og kinkuðu kolli til samþykkis. Ein kona lét sér það þó ekki nægja heldur æpti upp yfir sig á ensku með sænskum hreim. „Já, hann er svo ótrúlega sexy."

Silvía Nótt gaf tóninn

Þó kynþokki Eiríks þyki ærandi er laginu frá Úkraínu mun oftar spá sigri í keppninni. Ekkert annað lag virðist jafn sigurstranglegt og það. Flestir kunna að raula lagið þeirra Dancing Lasha Tumbai og dilla sér eins og dragdrottningin í álklæðunum Verka Serduchka. Meira segja þeir sem þola ekki lagið spá því orðið sigri vegna þeirrar athygli sem það fær.

„Úkraína notar sér þá arfleifð sem þið Íslendingar skylduð eftir með Silvíu Nótt. Fólk þolir orðið meira sprell eftir að hún gerði allt vitlaust í Grikklandi," sagði Martti Immonen, einn fremsti Evróvisjónspekingur Finna þegar hann var spurður álits á því hvaða lið væri sigurstranglegast. Hann kvaðst mjög ánægður með þær breytingar sem Silvía gerði en segir líklegt að ef jafn undarlegt lag og það úkraínska vinni nú, á eftir latex skrímslunum í Lordi, eigi einhverjum eftir að finnast sem keppnin sé komin út í of mikla vitleysu.

Gott ef Eiríkur vinnur

„Mér fannst Eiríkur frábær í Gleðibankanum en þá fékk hann ekki að njóta sín eins og hann er. Leðrið nú fer honum miklu betur, hann tekur sig rosalega vel út á sviðinu, eiginlega vona ég að hann vinni. Það væri gott fyrir keppnina að fá mann eins og hann í sigursætið," bætti Martti því næst við.

Það leikur engin vafi á því að ekkert vantar upp á kyntöfra Eiríks í Helsinki. Spurningin er hvort þeir og lag hans Valentine's Lost dugi til þess að koma Íslendingum upp úr undakeppninni.