Frí gisting um allan heim

Það er sama hvert þig langar að fara. Til Tansaníu, Tælands eða Tyrklands, já eða bara í helgarferð til New York, á heimasíðunni Hospitalityclub.org finnurðu fólk sem vill hýsa þig frítt, bjóða þér í mat eða sýna þér borgina.

„Ég vil meina að þetta sé eina alvöru leiðin til að ferðast ef maður vill ferðast lengi og eyða sem minnstum pening,“ segir Haukur Sigurðsson sem notar heimasíðuna Hospitalityclub.org grimmt.

„Þetta er miklu skemmtilegra en að vera á hótelum eða hostelum og hitta bara einhverja Ameríkana. Bæði endist peningurinn tíu sinnum lengur og svo er þetta líka miklu skemmtilegra. Maður hittir hressa heimamenn og kynnist betur menningunni.“

Hosptialityclub.org er heimasíða sem fólk getur skráð sig inn á til að útvega sér ókeypis gistingu í heimahúsum um allan heim. Fólk er skráð þar frá 207 löndum þannig að um margt er að velja.

Síðan er þannig upp byggð að fólk skráir sig inn og gefur upplýsingar um sjálft sig svo sem aldur, kyn, búsetu og annað. Hvort það er í aðstöðu til að hýsa aðra eða bara bjóða í mat eða kynnisferð um borgina. Eftir innskráninguna getur maður leitað uppi fólk úti um allan heim sem er í sömu hugleiðingum og er tilbúið að opna heimilið sitt fyrir ferðalöngum.

„Ég er búinn að vera skráður þarna í rúm tvö ár og hef notað síðuna mjög mikið. Ég hef gist hjá fólki úti um alla Evrópu og mín reynsla af þessu er eingöngu jákvæð.“

Haukur hefur hitt marga sem nota þessa heimasíðu, bæði stelpur og stráka, og enginn þeirra hefur slæma sögu að segja.

Haukur hefur þó lent á nokkrum furðufuglum á ferðum sínum. „Það er stundum eitthvað sem er pínlegt á meðan á því stendur en verður svo góð saga eftir á. Í versta falli býr maður bara til afsökun til að fara næsta dag og finnur sér nýjan gestgjafa.“

Flestir notenda síðunnar eru á aldrinum tuttugu til þrjátíu ára en þó er fólk þarna allt frá unglingum til eldri borgara.

Þegar Haukur er búinn að ákveða áfangastað fer hann á síðuna og skoði „prófíla“ fólksins í viðkomandi bæ eða borg og finni fólk sem honum líst á. Þá sendir hann nokkrum póst og fær nær alltaf jákvætt svar frá einhverjum þeirra. „Þetta er sjaldnast nein fimm stjörnu gisting, heldur yfirleitt pláss í stofusófa eða dýna á gólfi. En það er bara fínt, ég þarf ekki þægindi fyrr en ég verð orðinn gamall.“ segir Haukur að lokum.