Megn óánægja með nærbuxnatal Sigmars

Eftir Eurovision-keppnina á fimmtudag loguðu allar símalínur í útvarpshúsinu við Efstaleiti. Voru þar á ferð í það minnsta þrjátíu ósáttir greiðendur afnotagjalda sem blöskraði klámfengið tal kynnisins, Sigmars Guðmundssonar í Kastljósinu, milli laga.

Gerður Helgadóttir símadama tók við símtölunum en hún harðneitaði að staðfesta þetta við blaðamann Fréttablaðisins, sagðist vera bundin meiri trúnaði en leigubílstjórar í starfi sínu og að nú væri RÚV orðið ohf. Og ekki hægt lengur að vísa í upplýsingalög. Gerður gaf hins vegar samband við Jóhönnu Jóhannsdóttur, aðstoðardagskrárstjóra innlendrar dagskrár og sérstakan umsjónarmann Eurovision-keppninnar hjá RÚV ohf.

Jóhanna staðfesti það að margir hefðu haft samband og lýst yfir óánægju sinni. „Fólk hefur misjafnan smekk fyrir húmor,“ segir Jóhanna. Þeir sem hringja og kvarta fá að tjá sig að sögn Jóhönnu, á þá er hlustað og skoðað hvort um réttmætar athugasemdir sé að ræða.

„En það sem einum finnst ósæmilegt finnst öðrum fyndið. Fólk á fullan rétt á því, mislíki því eitthvað, að setja fram þá skoðun sína. En ég held að ekki hafi vakað fyrir Sigmari að vera meiðandi. Heldur hans leið að gera góðlátlegt grín. En við verðum að passa upp á það, upp að ákveðnu marki, að tala ekki niðrandi um keppendur og hampa einum á kostnað annars.“

Að sögn Jóhönnu voru það einkum Eista-brandarar Sigmars sem fóru fyrir brjóstið á fólki sem og nærbuxnatal.

„Hann sagði reyndar að þetta væri margtugginn aulabrandari. Og umræður um nærbuxur höfðu verið í fjölmiðlunum áður. Kannski er þetta einnig spurning um aldur. Skoðanir fullorðinna eru jafn réttháar og yngra fólks. Við verðum að gæta þess að öll þjóðin er að horfa en Eurovision hefur mælst með 87 prósenta áhorf.“