Réðust á ísraelska eftirlitsstöð

Fjórir herskáir Palestínumenn réðust í dag á eftirlitsstöð ísraelska hersins og skiptust á skotum við ísraelska hermenn.

Eftir því sem fram kemur á vef breska ríkisútvarpsins óku uppreisnarmennirnir, sem eru í samtökunum Heilagt stríð og al-Aqsa herdeildunum, í gegnum Kissufim-stöðina á landamærum Gasasvæðisins og Ísraels og hófu skothríð á ísraelska hermenn í nærliggjandi eftirlitsstöð. Stóð bardaginn í um þrjár klukkustundir og féll einn uppreisnarmannanna en engan hermanna sakaði að sögn Ísraela.

Uppreisnarmennirnir greindu frá því að þeir hefðu rænt ísraelskum hermanni í átökunum en þær fréttir báru Ísraelsmenn til baka. Árásin var sú fyrsta sem palestínskir uppreisnarmenn gera yfir landamærin frá því að þeir rændu hermanninum Gilad Shalit fyrir um ári.