Emil Hallfreðsson til Lyn í Noregi

Landsliðsmaðurinn Emil Hallfreðsson er á leið til norska úrvalsdeildarliðsins Lyn, en hann hefur verið á mála hjá enska úrvalsdeildarfélaginu Tottenham síðustu ár. Emil mun væntanlega skrifa undir þriggja og hálfs árs samning við norska félagið í næstu viku, en þá mun hann mæta á sína fyrstu æfingu hjá Lyn.

Emil fór til Tottenham frá FH árið 2005 en fékk aldrei tækifæri með aðalliði félagsins. Hann spilaði með Malmö í Svíþjóð sem lánsmaður á síðasta ári þar sem hann stóð sig prýðilega. Þá hefur hann verið í sviðsljósinu með íslenska landsliðinu undir stjórn Eyjólfs Sverrissonar.

Arnar Björnsson greindi frá þessu í kvöldfréttum Stöðvar 2.