Tveir handteknir - litið á atvikið sem hryðjuverk

Nú hefur fengist staðfest að tveir hafi verið handteknir í Glasgow grunaðir um að hafa reynt að aka bíl með einhverskonar sprengiefni inn í flugstöð Glasgow flugvallar. Heimildir herma að málið sé rannsakað sem hryðjuverk. Í fyrstu var sagt að fjórir hefðu verið handteknir vegna málsins, síðan þrír, en nú hefur lögregla staðfest að tveir séu í haldi.

Öryggisgæsla hefur verið aukin á öllum flugvöllum Englands og sömuleiðis í Bandaríkjunum.

Sérstakur fundur verður haldinn í kvöld í öryggisnefnd bresku ríkisstjórnarinnar, sem gengur undir nafninu COBRA. Þar mun forsætisráðherrann Gordon Brown stýra fundi en ekki innanríkisráðehrrann eins og venja er.

Á sjónvarpsstöðinni Sky er greint frá því að einhverjir hafi slasast en nánari upplýsingar hafa ekki verið gefnar að svo stöddu.

Vitni hafa einnig greint frá því að fólki hafi tekist að draga gaskúta út úr bílnum áður en hann varð alelda en það hefur ekki verið staðfest. Í bílunum sem fundust í gær í miðborg Lundúna voru einnig gaskútar, ásamt bensínílátum og nöglum.