Páfinn gagnrýnir Kínverja

Benedikt páfi gerði Kína að umræðuefni sínu í ræðu sem hann hélt í morgun. Hann gagnrýndi þarlend stjórnvöld harðlega fyrir hömlur sem þar eru settar á trúfrelsi. Hann sagðist þó vongóður um að Vatikanið og Kína næðu einhverskonar samkomulagi á næstu misserum. Engin samskipti hafa verið á milli Kína og Vatikansins frá árinu 1951 en talið er allt að 12 milljónir Kínverja séu kaþólskir.

Flestir þeirra iðka trú sína í hinni opinberu kaþólsku kirkju í Kína, sem heyrir undir stjórnvöld, á meðan aðrir eru í kirkjum sem starfa „neðanjarðar" og eru hallir undir Vatikanið. „Það er rétt að Kínverjar búa við meira trúfrelsi í dag en þeir gerðu áður," sagði páfinn. „Samt sem áður er ekki hægt að líta framhjá því að miklar hömlur eru settar á trúarlíf í landinu sem draga þróttinn úr þeim sem iðka trúnna."

Tengls Vatikansins við Kína voru slitin 1951, tveimur árum eftir byltingu kommúnista. Í ræðu sinni sagðist páfi vilja breyta þeirri stöðu. „Vatikanið er tilbúið í viðræður við stjórnvöld í Kína," sagði páfi og bætti við að slíkar viðræður væru nauðsynlegar til þess að leysa fyrri deilumál.