Tveir starfsmenn Rauða krossins féllu í Líbanon

Tveir starfsmenn Rauða krossins voru skotnir til bana í dag við flóttamannabúðir Palestínumanna í Líbanon. Starfsmennirnir, sem voru líbanskir, voru að flytja slasaða borgara af átakasvæðinu þegar þeir féllu, en líbanskir hermenn hafa barist við íslamska vígamenn í búðunum undanfarið. Þriðji starfsmaður Rauða krossins slasaðist einnig lífshættulega.

Að minnsta kosti ellefu létu lífið í bardögum helgarinnar í Nahr al-Bared flóttamannabúðunum og nú hafa fleiri en 120 fallið í bardögunum sem eru þeir hörðustu síðan friður komst á í Líbanon fyrir 17 árum síðan, að því er fréttastofa breska ríkisútvarpsins greinir frá.