Loftsteinn gæti lent á jörðinni árið 2036

Loftsteinn gæti lent á jörðinni innan tíðar, eða árið 2036, gangi spár sumra vísindamanna eftir. Verið er að vinna að áætlunum til þess að koma í veg fyrir að steinninn, Apophis skelli á jörðinni og eru há verðlaun í boði fyrir bestu hugmyndina. Samtökin „The planetary society" segja að þörf sé á því að fylgjast með steininum með nákvæmari hætti en nú er mögulegt og því eru vísindamenn beðnir um að koma með hugmyndir um hvernig best sé að koma fyrir staðsetningartæki á grjótinu sem er 300 metrar í þvermál.

Stjórnarformaður samtakanna segir í samtali við fréttastofu Sky að ekki gott að reikna út nákvæmlega hvenær steinninn lendi á jörðinni en hann segir hættuna af árekstri vera raunverulega. Fimmtíu þúsund dollarar eru boðnir í verðlaun til þeirra sem koma með bestu tillöguna.

Meðlimir annara stjörnuskoðunarsamtaka eru ekki eins vissir í sinni sök og ráðleggur einn þeirra fólki taka ekki of mikið mark á fréttunum. Hann segir ekki verulegar líkur á því að Aphopis lendi á jörðinni en þrátt fyrir það er hann fylgjandi hugmyndum um að koma fyrir staðsetningarbúnaði á yfirborði hans. „Einhverntíma í framtíðinni munum við verða í raunverulegri þörf fyrir búnað af þessu tagi," sagði hann í viðtali við Sky.