Sprengjutilræði við Kabúlflugvöll - Íslendingar ómeiddir

Þrettán Íslendingar sluppu ómeiddir þegar árás var gerð á Kabúl flugvöll í morgun með þeim afleiðingum að tveir hermenn létust og fjöldi særðist.

Íslendingarnir voru staddir á Kabúl flugvelli þegar árásarmaður ók bíl sínum inn í þvögu á athafnasvæði sveita Atlantshafsbandalagsins við flugvöllinn. Hann sprengdi bílinn með þeim afleiðingum að hann lét lífið sjálfur og einnig tveir afganskir hermenn en tugir annarra særðust.

Árásinni virðist hafa verið beint gegn þýskum NATO hermönnum sem þarna voru.

Anna Jóhannsdóttir forstöðumaður íslensku friðargæslunnar segir að þrettán Íslendingar sem voru á flugvellinum séu allir ómeiddir og hafi haft samband við ættingja sína hér heima.

Á svipuðum tíma gerðu sveitir Talibana árás á bandaríska herstöð nálægt landamærunum við Pakistan. Þeir hittu hins vegar hverfi þar sem óbreyttir borgarar búa og felldu að minnsta kosti tíu manns.

Þrátt fyrir árásina á flugvöllinn í morgun héldu borgaraleg flug áfram, meðal annars flugvélar sem báru nítján suður-kóreskar konur út úr Afganistan, þar sem þær voru í gíslingu talibana í um sex vikur.