Enn eitt unglingamorðið í Lundúnum

17 ára drengur var stunginn til bana í Lundúnum í gær. Þetta er enn eitt morðið í höfuðborginni þar sem unglingar koma við sögu en lögregla hefur handtekið tvo 16 ára drengi vegna málsins. Ekki er talið að morðið tengist unglingagengjunum í borginni sem talin eru bera ábyrgð á meirihluta þeirra morða sem framin hafa verið á unglingum síðustu misserin.

Í skýrslu sem Lundúnalögregla gerði opinbera í síðustu viku kemur fram að talið er að 257 unglingagengi séu starfrækt í borginni. Mörg þeirra eru sögð standa á bak við alvarlega ofbeldisglæpi.