Líkur á að bandaríska herliðið verði kallað heim

George Bush Bandaríkjaforseti segir líkur á að bandaríska herliðið í Írak verði kallað heim ef öryggisaðstæður í landinu haldi áfram að batna. Forsetinn kom í óvænta heimsókn til Íraks í morgun.

George Bush Bandaríkjaforseti lenti í Bagdad snemma í morgun. Condolezza Rice utanríkisráðherra Bandaríkjanna, Robert Gates varnarmálaráðherra og Stephen Hadley þjóðaröryggisráðgjafi Bandaríkjanna hittu Bush einnig í Írak. Forsetinn og föruneyti hans hittu æðstu foringja í bandaríska hernum, bandaríska sendiherrann og forsætisráðherra landsins Nuri al Maliki.

Tilgangur heimsóknar Bush hefur verið á huldu en talið er að hann vilji kanna ástandið í landinu áður en bandaríska þingið kemur saman í lok mánaðar. Unnið er að skýrslu um stöðuna í Írak fyrir bandaríska þingið og er búist við því að hún verði tilbúin eftir nokkrar vikur.

Fjölgað var í herliði bandaríska hersins í Írak í febrúar síðastliðnum og voru um þrjátíu þúsund hermenn sendir þangað í því augnamiði að ná betri tökum á ástandinu. Bush er undir miklum þrýstingi frá demókrötum, sem vilja kalla herliðið heim. Um 3700 bandarískir hermenn hafa látist í Írak.

 

Á fréttavef CNN kemur fram að Bush segir vel koma til greina að kalla herliðið heim ef öryggisaðstæður í landinu haldi áfram að batna. Þar er haft eftir honum hann telji aðstæður í landinu hafa orðið betri eftir að fleiri bandarískir hermenn voru sendir til Íraks.

Nouri Al Maliki, forsætisáðherra Íraks, lýsti því yfir í dag að verulega hefði dregið úr stríðsátökunum í Írak síðustu mánuði og aðstæður væru betri. Talið er að rúmlega sex hundruð þúsund borgarar hafi látið lífið frá því bandaríski herinn réðst inn í landið árið 2003.