Rúnar kvaddi með stoðsendingu

Taugar Vesturbæinga hafa verið þandar til hins ýtrasta í sumar enda hefur KR setið á botninum í nánast allt sumar. Brúnin lyftist af Vesturbæingum þegar ljóst var að liðið slapp við fall eftir 1-1 jafntefli gegn Fylki sem þar með missti af þriðja sætinu.

KR-ingar þökkuðu stuðningsmönnum sínum eftir leikinn og það áttu þeir skilið enda staðið sig talsvert betur en liðið. Þó nokkuð margir bauluðu á leikmenn liðsins í leikslok. Lái þeim hver sem vill.

„Þetta verkefni var erfiðara en ég átti von á í fyrstu. Markmiðið náðist samt og KR er áfram í efstu deild þar sem það á að vera,“ sagði Logi Ólafsson þjálfari KR, eftir leikinn sem var ekki eftirminnilegur. Óskar Örn kom KR yfir með marki eftir stungusendingu Rúnars Kristinssonar en Peter Gravesen jafnaði úr víti undir lokin.

„Ég get ekkert sagt um það á þessari stundu hvort ég eða félagið hafi áhuga á frekara samstarfi,“ sagði Logi um framhaldið.

Rúnar Kristinsson spilaði sinn síðasta knattspyrnuleik í gær. „Ég er hættur. Það breytir því enginn. Mér hefur ekki liðið vel í sumar, ekki getað æft mikið og ekki verið eins heill á líkama og sál og ég hefði viljað vera. Ég hefði viljað sýna meira en því er ekki að neita að ég er þreyttur eftir tímabilið. Ég sé samt ekki eftir því að hafa klárað ferilinn með KR,“ sagði Rúnar.

„Ég er þokkalega sáttur í lok sumars. Við erum að byggja upp og það gengur mjög vel. Vörnin frábær í sumar og við þurfum að bæta sóknarleikinn.“ sagði Leifur Garðarsson sem verður áfram með Fylkisliðið næsta sumar. - hbg